ကျူမိုးအိမ်၊ မြက်မိုးအိမ်မှ လွင့်စင်လာသော မီးသည် အိမ်ကြီး အိမ်ကောင်းတို့ကို လောင်ကျွမ်း သကဲ့သို့ အလုံးစုံသော ဘေးရန်တို့သည် သူမိုက်တို့ကြောင့် ဖြစ်ကုန်၏။ ပညာရှိတို့ကြောင့် မဖြစ်ကုန်။
ဗုဒ္ဓ (အံ၊ ၁၊ ၉၉)
ပညာရှိသည် နည်းမှန်လမ်းမှန်ကို ကျင့်တတ်၏။ မပြုသင့်သော အရာမျိုး၌ မတိုက်တွန်းတတ်၊ မှန်ကန်သော နည်းလမ်းသည် ပညာရှိအတွက် အကောင်း အမြတ်ဖြစ်၏။ ပညာရှိသည် အကျိုးသင့် အကြောင်းသင့် ပြောဆိုသော် စိတ်မဆိုးတတ်၊ စည်းကမ်း နည်းလမ်းကို နားလည် ကျင့်သုံးတတ်၏။ ထိုပညာရှိနှင့် ပေါင်းသင်းရခြင်းသည် ကောင်းမြတ်၏။
ဗုဒ္ဓ (ဇာ၊ ၁၊ ၂၆၇)
လူမိုက်နှင့် အတူတကွ နေရခြင်းသည် ရန်သူနှင့် နေရသကဲ့သို့ အခါခပ်သိမ်း ဆင်းရဲ၏။ ပညာရှိနှင့် အတူတကွ နေရခြင်းသည် ဆွေမျိုးနှင့် နေရသကဲ့သို့ ချမ်းသာ၏။
ဗုဒ္ဓ (ဓမ္မပဒ၊ ၄၄)
ပညာမဲ့ လူမိုက်တို့၏ ကဲ့ရဲ့ခြင်း ချီးမွမ်းခြင်းသည် ပမာဏမဟုတ် (မဓာနမဟုတ်၊ အလေးးထားစရာ မလို)။ ပညာရှိတို့၏ ကဲ့ရဲ့ခြင်း ချီးမွမ်းခြင်းသည်သာ မာဏဖြစ်သည် (အလေးထား သင့်သည်)။ (ဓမ္မပဒ၊ ဋ္ဌ၊ ၂၊ ၂၁၀)
ပညာမဲ့သူတို့၏ ချီးမွမ်းခြင်းနှင့် ပညာရှိတို့၏ ကဲ့ရဲ့ခြင်း (နှစ်ခု) တို့တွင် ပညာရှိတို့၏ ကဲ့ရဲ့ခြင်းက မြတ်သေး၏။ ပညာမဲ့သူတို့၏ ချီးမွမ်းခြင်းသည်ကား မမြတ်သည်သာတည်း။
ဂေါဒတ္တထေရ၊ (ထေရ၊ မြန်၊ ၁၀၇)
တောင်ဇလပ်ပန်းကို ပေါက်ဖက်နှင့် ထုပ်လျှင် ပေါက်ဖက်များလည်း မွှေးကြိုင်သွားသကဲ့သို့ ပညာရှိကို မှီဝဲသောသူသည် အခြားပညာရှိ သူတော်ကောင်းတို့၏ နှစ်သက်ဖွယ်၊ ချီးမွမ်းဖွယ် ပုဂ္ဂိုလ် အဖြစ်သို့ ရောက်ရသည်။
ဗုဒ္ဓ (ဣတိဝုတ်၊ ၂၄၁)
ပညာရှိသည် ကုန်းတိုက်တတ်သူနှင့်လည်းကောင်း၊ အမျက်ထွက်လေ့ရှိသူနှင့် လည်းကောင်း၊ သတ္တ၀ါတို့ ပျက်စီးခြင်းကို လိုလားနှစ်သက်သူနှင့် လည်းကောင်း၊ ပေါင်းဖော်ခြင်းကို မပြုရာ။ သူယုတ်မာနှင့် ပေါင်းဖော်ရခြင်းသည် ယုတ်မာ၏။
ပညာရှိသူသည် ယုံကြည်မှု သဒ္ဓါရှိသူနှင့်လည်းကောင်း၊ ကိုယ်ကျင့်သီလကို ချစ်မြတ်နိုးသူ နှင့်လည်းကောင်း၊ ဥာဏ်ပညာပြည့်စုံသူနှင့်လည်းကောင်း၊ အကြားအမြင်များသူနှင့် လည်းကောင်း ပေါင်းဖော်ခြင်းကို ပြုရာ၏။ ပညာရှိသူတော်ကောင်းနှင့် ပေါင်းဖော်ရခြင်းသည် ကောင်းမြတ်လှ၏။
အာနန္ဒတ္ထေရ၊ (ထေရ၊ မြန်၊ ၁၄၇)
ပညာကြီးသူသည် မိမိဆင်းရဲရန် မလှုံ့ဆော်၊ သူတပါးဆင်းရဲရန် မလှုံ့ဆော်၊ နှစ်ပါးစုံ ဆင်းရဲရန် မလှုံ့ဆော်။ မိမိ၏ အစီးအပွား၊ သူတပါး၏ အစီးအပွား၊ မိမိသူတပါး နှစ်ပါးစုံတို့၏ အစီးအပွား၊ အလုံးစုံသော သတ္တလောက၏ အစီးအပွားကို သာလျှင် ကြံစည်၏။
ဗုဒ္ဓ (အံ၊ ၁၊ ၄၉၈-၉)
ပညာသည် ကြားမြင်အပ်တိုင်းသော အရာကို ဆုံးဖြတ်နိုင်ခြင်း သဘောရှိ၍ မျက်မှောက်မျက်ကွယ် ကျော်စောသတင်း ပျံ့နှံ့ခြင်းကို တိုးပွားစေနိုင်၏။ လောက၌ ပညာရှိသောသူသည် ဆင်းရဲဒုက္ခမှသော်လည်း ချမ်းသာသုခကို ထုတ်နုတ်ရယူနိုင်၏။
ထေရ၊ ၃၀၂။
Burmese Children မှတင်ပြပါသည်။
Subscribe to:
Post Comments (Atom)
0 comments:
Post a Comment